Американскиот претседател Доналд Трамп изјави дека САД се подготвени да ги придружуваат трговските бродови и танкерите низ Ормускиот Теснец, истовремено повикувајќи меѓународни сојузници да испратат свои воени бродови за обезбедување на пловидбата.
– „Многу земји ќе испратат воени бродови заедно со САД за да го одржат теснецот отворен и безбеден“, порача Трамп, повикувајќи меѓу другите Кина, Франција, Јапонија, Јужна Кореја и Велика Британија да се приклучат на операцијата.
Повикот доаѓа во време на сериозно влошување на безбедносната ситуација во регионот поради конфликтот меѓу САД, Израел и Иран. Во изминатите денови, ирански сили извршиле напади со беспилотни летала врз танкери и пристаништа во Оман, при што има загинати и повредени. Американската морнарица, од своја страна, тврди дека уништила повеќе ирански бродови кои поставувале морски мини во Персискиот Залив.
Трговските бродови и нафтените танкери сега се соочуваат со ризик од беспилотни летала, противбродски ракети и морски мини, што ја прави пловидбата низ теснецот исклучително опасна. Некои бродски компании веќе ги прекинаа или одложија своите пловидби.
Американската морнарица разгледува и операција за расчистување на морските мини со помош на специјализирани бродови, подводни дронови и нуркачки тимови, но експертите предупредуваат дека оваа мисија може да трае долго и да биде многу ризична.
Неколку земји веќе ја разгледуваат можноста да се приклучат на меѓународната поморска мисија: Франција најави испраќање воени бродови, Велика Британија разгледува испраќање бродови и беспилотни системи за откривање морски мини, додека Јапонија, Јужна Кореја и Индија ги преземаат своите мерки за заштита на енергетските испораки.
Воените аналитичари предупредуваат дека секоја операција во Ормускиот Теснец е ризична, бидејќи Иран располага со брзи напаѓачки чамци, мали подморници, ракети и беспилотни летала.
Ормускиот Теснец е еден од најважните поморски премини во светот, кој ги поврзува Персискиот Залив и Индискиот Океан. Околу една петтина од светската морска нафта минува токму по оваа рута, па секое нарушување веднаш се одразува врз глобалните пазари и цените на енергенсите.
