Високиот комесар на ОН за човекови права, Волкер Турк, изрази надеж дека моментумот околу мировниот план ќе биде доволен за конечно ставање крај на војната во Газа. Неговата канцеларија порача дека ова е историска можност за „еднаш засекогаш да престанат масакрот и страдањата“, со масовна хуманитарна помош и ослободување на заложници.
Американскиот план предвидува прекин на огнот, ослободување на заробените Израелци за 72 часа, постепено повлекување на израелската армија, разоружување и отстранување на Хамас од власт, како и протерување на неговите борци од Газа.
СЗО го поздрави договорот, нагласувајќи дека обновата на болниците и стабилноста се од суштинско значење, а генералниот директор Тедрос Гебрејесус порача дека „мирот е најдобриот лек“.
Хамас пак соопшти дека е подготвен за итни преговори околу ослободување на заробените Израелци и прекин на војната. Израел најави подготвеност да ја спроведе првата фаза од американскиот план за ослободување на заложниците, но не ја потврди можноста за стопирање на бомбардирањето.
Меѓународниот притисок расте, а исходот ќе покаже дали Газа конечно ќе ја добие шансата за мир и закрепнување.
