Воздушен напад од Иран погодил цели во Дубаи, поточно во најелитниот дел кај Палм Џумеира, јавуваат македонски иселеници за „Скопје1“. Сведоците раскажуваат дека во текот на вечерта се слушнале силни експлозии во близина на луксузниот туристички и станбен комплекс, по што беа активирани безбедносните протоколи. Засега нема официјална потврда од властите на Обединетите Арапски Емирати за обемот на нападот, ниту информации за евентуални жртви или материјална штета.
Претходно, регионалните медиуми јавија дека Иран извршил ракетни напади врз повеќе американски воени локации во регионот, при што експлозии беа пријавени во неколку делови од Заливот, вклучувајќи ги и Дубаи и Абу Даби. Системите за противвоздушна одбрана на ОАЕ успеале да пресретнат дел од проектилите, но не се исклучува можноста некои остатоци да предизвикале материјална штета или повреди.
Македонските граѓани кои живеат или престојуваат во Дубаи се предупредени да ги следат официјалните најави и да постапуваат согласно безбедносните инструкции. Во Палм Џумеира, каде се наоѓаат и бројни странски туристи и резиденти, атмосферата е напната, а многумина се евакуирани или се засолнети во безбедни згради.
Иранскиот напад доаѓа во контекст на ескалацијата на тензиите на Блискиот Исток по американско-израелските удари врз ирански цели. Меѓународната заедница внимателно ја следи ситуацијата, додека локалните власти апелираат за мир и смиреност меѓу граѓаните. Последиците од нападот за безбедноста, инфраструктурата и животот на населението допрва ќе се проценуваат.
