Во Дубаи избувна пожар близу влезот на луксузниот хотел Fairmont The Palm, поради остатоци кои паднале од небото за време на иранскиот ракетен напад. На социјалните мрежи се проширија снимки од оган и густ чад, автентичноста на кои ја потврди Sky News. Хотелот, кој е познат по врвни ресторани, наградуван спа центар и базени со поглед на градот, моментално е безбедносно евакуиран.
Иранските државни медиуми соопштија дека нападот бил насочен кон Дубаи, додека Министерството за одбрана на ОАЕ потврди дека нивните системи успеале да пресретнат нова серија ирански проектили и беспилотни летала. Не се објавени деталите за конкретните цели, но во Емиратите се стационирани американски воени сили, што ги прави областите потенцијални цели.
Овој напад следи по утринската офанзива на САД и Израел врз ирански цели во Техеран и други градови, при што беа регистрирани најмалку три експлозии. Американскиот претседател Доналд Трамп истакна дека нападот има за цел да го отстрани безбедносниот ризик за САД и да им даде на Иранците можност за промена на владата. Израел прогласи вонредна состојба поради очекуваната иранска одмазда со дронови и балистички ракети.
Pentagon го нарече американскиот напад „Епски гнев“, додека Израел ја означи својата офанзива како „Лавовски рик“. Иран возврати со испукување ракети кон Израел и врз американските бази во Бахреин, ОАЕ и Катар. Градот Дубаи моментално е во засилена безбедносна готовност, а властите апелираат до сите жители и туристи да ги следат официјалните инструкции и да останат во безбедни згради.
