ИЗБИВНУВАЊЕТО НА ЕБОЛА ВО ДЕМОКРАТСКА РЕПУБЛИКА КОНГО МОЖЕЛО ДА ЗАПОЧНЕ УШТЕ ВО ЈАНУАРИ, ИЗЈАВИ ДИРЕКТОРОТ НА СВЕТСКАТА ЗДРАВСТВЕНА ОРГАНИЗАЦИЈА, ОЦЕНУВАЈЌИ ДЕКА ВИРУСОТ ПОРАДИ ТОА ДОБИЛ „ГОЛЕМА ПРЕДНОСТ“.
Д-р Тедрос Аданом Гебреисус исто така рече дека одговорот на епидемијата го отежнуваат општите ограничувања за патување, како и високото ниво на недоверба меѓу населението и нискиот процент на следење на контактите на заразените лица.
Откако епидемијата беше идентификувана во средината на мај, вирусот Бундибуџо предизвика 344 потврдени случаи на ебола, вклучувајќи 60 смртни исходи во Демократска Република Конго, како и 15 потврдени случаи и еден смртен исход во соседна Уганда.
„Епидемијата имаше голема предност на почетокот, а ние и понатаму заостануваме“, рече Тедрос, додавајќи дека одговорот на кризата забрзано се подобрува, како и дека центрите за лекување сега се воспоставени низ провинцијата Итури, најтешко погодената област во Конго.
Тој ги повика земјите кои воведоа општи ограничувања за патување, како што се Соединетите Американски Држави, да ги укинат.
„Тие ограничувања ги нарушуваат синџирите на снабдување и го отежнуваат одговорот на епидемијата“, рече тој.
Следењето на контактите, како клучен дел од борбата против секоја заразна болест, е особено отежнато поради несигурноста и раселувањето на населението во провинцијата Итури, наведе Тедрос, истакнувајќи дека во моментов се следат само околу 45 отсто од контактите.
„За да преземеме контрола над епидемијата, потребно е тој процент да го зголемиме на повеќе од 90 отсто“, рече тој.
Бројот на сомнителни случаи во Демократска Република Конго нагло падна во вторникот од повеќе од 1.000 на 116, откако здравствените власти ги обработија заостанатите примероци и утврдија дали случаите се потврдени или отфрлени.
Тедрос рече дека еден од приоритетите е зголемување на лабораториските и дијагностичките капацитети во најпогодените области, како и во соседните провинции и држави.
Медицинска сестра е првата заразена во епидемијата
Првиот идентификуван случај во оваа епидемија беше медицинска сестра која на 24 април се јавила во здравствен центар, но Тедрос наведе дека постојат и други можни временски проценки за почетокот на ширењето на вирусот.
„Можело да биде во јануари, февруари, март или април, но мислам дека фокусот сега треба да биде на одговорот на епидемијата“, рече тој.
Локалните лидери не веруваат дека постои ебола
Недовербата на населението претставува сериозна пречка, истакна тој, наведувајќи дека некои локални лидери за време на неговата посета на Конго минатата недела му рекле дека не веруваат дека еболата навистина постои. Исто така, тие изразиле загриженост дека борбата против епидемијата ќе ги пренасочи ресурсите од други важни здравствени услуги.
Во моментов не постои вакцина ниту специфичен лек за сојот на вирусот Бундибуџо, но Тедрос рече дека закрепнувањето на шест лица во Демократска Република Конго и две лица во Уганда покажува дека луѓето можат да преживеат ебола доколку имаат пристап до здравствена нега и ако се јават во здравствените установи штом ги забележат симптомите.
Британското Министерство за надворешни работи, Комонвелт и развој на Обединетото Кралство соопшти дека го прекинува (активира) лансирањето на мрежа за истражување на повеќекратни ризици, преку која експерти од Обединетото Кралство и партнерските земји ќе можат да даваат брзи совети и научни докази за нови заразни болести и други кризи, вклучувајќи ја и актуелната епидемија на ебола.
