Австралија повторно е потресена од смртоносно вооружено насилство, откако три лица го загубија животот во пукање што се случило во малиот град Лејк Каргелиго, во државата Нов Јужен Велс. Во истиот инцидент, уште едно лице било тешко повредено и итно пренесено во болница, каде се наоѓа во сериозна, но стабилна состојба, соопшти полицијата.
Локалните полициски служби веднаш започнале истрага по пријавеното пукање, кое се случило околу 16:40 часот по локално време. Поради сериозноста на ситуацијата и фактот што осомничениот сè уште не е приведен, жителите биле повикани да ја избегнуваат областа, додека на населението му било советувано да остане во своите домови до понатамошно известување.
Според официјалното полициско соопштение, службите за итни случаи биле испратени на улицата Вокер, во близина на улицата Јелкин, откако биле примени повеќе пријави за истрели. По пристигнувањето на местото на настанот, било утврдено дека две жени и еден маж починале на лице место, и покрај обидите за укажување помош.
Австралискиот медиум „Севен њуз“ пренесува дека вооружениот напаѓач избегал од местото на злосторството со возило кое било во сопственост на локалниот совет. Полицијата засега не открива дополнителни информации за идентитетот на осомничениот, ниту за жртвите, додека потрагата е во тек.
Лејк Каргелиго се наоѓа во централниот дел на Нов Јужен Велс и брои околу 1.500 жители, што дополнително ја зголемува вознемиреноста меѓу локалното население. Овој трагичен настан доаѓа само кратко време по масовното пукање што минатиот месец се случи на плажата Бонди во Сиднеј, каде животот го загубија 15 лица, што повторно ги отвори стравувањата од вооружено насилство во земјата.
