Вредни слики од светски познати уметници како Пјер-Огист Реноар, Пол Сезан и Анри Матис се украдени во дрска и прецизно изведена кражба од музеј во близина на Парма, соопшти италијанската полиција.
Инцидентот се случил на 22 март, кога четворица маскирани напаѓачи влегле во вилата на Фондација Мањани Рока, лоцирана во близина на Падова, и за исклучително кратко време успеале да ги однесат делата „Бањарки“ од Реноар, „Мртва природа со цреши“ од Сезан и „Одалиска на тераса“ од Матис.
Според италијанските медиуми, целата акција траела само три минути – влегување, лоцирање на целите и бегство, сè било изведено со неверојатна брзина. Единственото што ги прекинало било активирањето на алармот во музејот, што спречило да однесат уште повеќе уметнички дела.
Од Фондација Мањани Рока, позната и како „вила на ремек-делата“, велат дека нападот бил извонредно прецизен и добро испланиран. Фактот што крадците директно се упатиле кон конкретни слики и ја завршиле операцијата во рекордно време, дополнително ги засилува сомнежите кај истражителите дека станува збор за однапред организирана акција, а не за спонтана кражба.
Случајот веќе го презедоа италијанските карабинери и специјалните единици за заштита на културното наследство. Во тек е детална анализа на снимките од безбедносните камери, како и собирање траги кои би можеле да помогнат во лоцирање на украдените дела.
Истрагата се одвива под силен притисок, бидејќи ваквите уметнички вредности, кога еднаш ќе исчезнат од легалните текови, многу брзо завршуваат на црниот пазар, каде нивното пронаоѓање станува значително потешко.
Ова не е изолиран случај – неодамна слична кражба се случи и во Лувр во Париз, каде што беа украдени вредни предмети за само седум минути, што дополнително ја зголемува загриженоста за безбедноста на културните институции.
Во меѓувреме, италијанската полиција минатата недела разби организирана криминална група специјализирана за провали, која дејствувала во региони како Падова, Венеција и Тревизо. При апсењата биле пронајдени украдени предмети, вклучително и накит и луксузен часовник, што покажува дека организираниот криминал во оваа област сè уште претставува сериозна закана.
