По средбата на рускиот претседател Владимир Путин со американските претставници Стив Виткоф и Џаред Кушнер, Кремљ испратил сигнал дека Москва и натаму не е подготвена за значителни компромиси околу условите за завршување на војната во Украина.
Според анализата на Институтот за проучување на војната (ISW), едно од клучните руски барања останува Украина да се повлече од целиот Донецки регион, вклучително и од териториите што руските сили во моментов не ги контролираат.
Аналитичарите наведуваат дека Путин повторно поставил рок пред руските сили за освојување на целиот регион. Според нив, ваквите очекувања се резултат на искривена претстава за реалната состојба на бојното поле.
Од ISW оценуваат дека руските воени команданти на различни нивоа веројатно му доставуваат на Путин неточни или претерано оптимистички информации за напредувањето на руската армија.
Токму таквите информации, според анализата, можат дополнително да го зацврстат уверувањето на рускиот претседател дека Москва може да ги постигне своите цели без да прави отстапки во евентуалните мировни преговори.
ISW: Со ова темпо, Донецк не би бил освоен до 2032 година
Институтот посочува дека проценките на Путин не се совпаѓаат со реалната состојба на теренот, земајќи ги предвид украинските одбранбени капацитети, состојбата на руските офанзивни сили и големината на територијата што Москва сè уште би требало да ја освои.
Според нивната проценка, доколку руските сили продолжат да напредуваат со сегашното темпо, целосното освојување на Донецката област не би било постигнато до 2032 година – под услов воопшто да биде постигнато.
Аналитичарите сметаат дека ваквата разлика меѓу очекувањата на Кремљ и состојбата на бојното поле може директно да влијае и врз позицијата на Москва во евентуалните преговори со Украина и САД.
