Иранските вооружени сили негираа дека испалиле ракета кон Турција, откако турските власти вчера соопштија дека воздушната одбрана на НАТО пресрела проектил од иранско потекло кој се движел кон турскиот воздушен простор.
„Иранските вооружени сили го почитуваат суверенитетот на Турција и негираат дека испалиле каква било ракета кон нејзина територија“, објавија државните ирански медиуми преку соопштение на Генералштабот на Иран.
Турски функционери, сепак, наведуваат дека ракетата најверојатно била насочена кон база во грчкиот дел на Кипар, но ја променила својата траекторија пред да биде пресретната. Министерството за одбрана на Турција информира дека проектилот прелетал над Ирак и Сирија, пред да биде соборен од системите на НАТО во источниот Медитеран, а остатоците од него паднале во покраината Хатај.
Засега нема официјален коментар од САД, кои имаат воздухопловни сили стационирани во базата Инџирлик во јужна Турција.
Турското Министерство за одбрана предупреди дека ќе продолжи со консултации со НАТО и сојузниците и дека ќе преземе сите неопходни мерки за заштита на територијата и воздушниот простор на земјата. Анкара во меѓувреме го повикала иранскиот амбасадор на разговори за официјален протест поради инцидентот.
Според досегашните информации, во инцидентот нема жртви или повредени.
