Голем безбедносен инцидент се случи во неделата во селото Велфорд во близина на британската воена база РАФ Ферфорд, која ја користи и американското воено воздухопловство. Контратерористичката полиција започна официјална истрага, а петмината уапсени мажи сега се осомничени и за подготовка на терористички напад и поседување експлозив.
Повеќе куќи се евакуирани, а полицијата воспостави безбедносен кордон во радиус од 400 метри. Во меѓувреме, во британските медиуми и на социјалните мрежи се појавија и фотографии од самото апсење, кои наводно го прикажуваат моментот кога полицијата ги приведува осомничените мажи во раните утрински часови.
Полицијата во Глостершир објави дека дојавата за три сомнителни возила кои се движеле кон базата ја примиле околу 0:45 часот во неделата, по што следувало апсењето врз основа на Законот за експлозиви и антитерористичките закони.
Снимките од воздух прикажуваат робот за деактивирање бомби како прегледува три бели комбиња во шумичка веднаш до базата, додека воениот тим за отстранување експлозивни направи (EOD) го обезбедува местото на настанот.
Жителите привремено евакуирани
Жителите на Велфорд, вкупно 85 домаќинства, се привремено евакуирани, а многумина се сместени во блискиот рекреативен центар додека трае увидот. Локалните власти наведуваат дека постои можност евакуираните мештани да мора да ја поминат ноќта надвор од своите домови, поради што веќе им се доставуваат храна и сите потребни средства.
Полицијата засега верува дека ситуацијата е под контрола, но ја повикува јавноста да се воздржи од шпекулации. На подрачјето е распореден голем број припадници на итните служби, меѓу кои и специјализиран тим за интервенции во опасни подрачја.
— Во рана фаза сме од истрагата, а петмината мажи остануваат во притвор. Тесно соработуваме со партнерските служби за да ги прибереме сите докази и да ги разјасниме сите околности — потврди Вики Еванс од контратерористичката полиција.
Појачани мерки околу базата
За инцидентот официјално е известен и британскиот премиер Енди Бернам, кој редовно ги прима најновите информации. Министерот за одбрана Вес Стритинг ѝ порача на јавноста дека „можат да бидат мирни бидејќи вооружените сили и тимовите за итни интервенции се во приправност 24 часа на ден“.
РАФ Ферфорд се наоѓа во непосредна близина на Велфорд и е база која ја користи и американското воено воздухопловство, поточно Командата за глобални удари. Последните месеци од неа беа распоредувани американски стратешки бомбардери Б-1 кои учествуваат во операциите, посебно откако на 28 февруари започна судирот во Иран.
Претставник на американските воздухопловни сили во базата изјави дека „поради оперативна безбедност нема да разговара за специфичните мерки за заштита“, но потврди дека нивните единици остануваат на висок степен на подготвеност.
Мештаните сведочат дека безбедносните мерки околу самата база се драстично појачани последниве недели, со поставување масивни препреки на сите влезови.
Полицијата засега го нема објавено идентитетот на уапсените мажи, ниту детали за тоа што точно е пронајдено во прегледаните комбиња.
Се јави и Трамп
Американскиот претседател Доналд Трамп им изјави на новинарите дека мажите кои беа уапсени во неделата во близина на базата РАФ Ферфорд „имале намера да сторат голема штета“.
— Беа под наша истрага. Намераваа да ѝ нанесете голема штета на нашата база, а соработката со Британците се покажа како извонредна. Можеби тоа беше Скотланд Јард, не знам. Соработувавме со многумина од нив. Долго ги држевме на око и ги фативме. Беше фантастично. Соработката со Британија беше неверојатна — изјави Трамп.
