Додека светот внимателно ги следи проектите на НАСА и SpaceX, од Русија доаѓа вест што може целосно да ја преврти иднината на вселенските патувања. Според информации објавени од странски медиуми, руски научници работат на нов тип вселенски мотор кој би можел драматично да го скрати времето потребно за патување до Марс – од неколку месеци на само неколку недели, па дури и денови.
Станува збор за напреден мотор со плазма погон, кој моментално се наоѓа во фаза на тестирање на Земјата. Проектот го развива Троицкиот институт, кој функционира во рамки на руската државна корпорација Росатом. Според првичните резултати, технологијата покажува потенцијал што далеку ги надминува постоечките хемиски ракетни мотори.
За разлика од класичните системи, овој мотор користи силни електромагнетни полиња за забрзување на честички водород, со што се постигнува многу поголема брзина и ефикасност. Доколку тестирањата продолжат успешно, експертите веруваат дека моторот би можел да биде подготвен за практична вселенска употреба околу 2030 година.
Ваквиот технолошки пробив не би имал значење само за истражувањето на Марс, туку и за пошироки меѓупланетарни мисии, како и за потенцијални безбедносни и одбранбени апликации. Ако најавите се покажат како точни, Русија би можела повторно да се најде во самиот врв на глобалната вселенска трка.
Прашањето што останува е: дали ова е вистинска револуција или само амбициозна најава што допрва треба да се докаже?
