Москва повторно ја потресе меѓународната сцена со остри изјави против украинскиот претседател Володимир Зеленски. Според портпаролката на руското Министерство за надворешни работи, Марија Захарова, Зеленски со своите барања за членство во НАТО и нуклеарно оружје директно провоцира опасен конфликт кој може да има катастрофални последици за целиот континент.
Захарова тврди дека Киев гранатира делови од нуклеарната централа во Запорожје, што ја става Европа во ризик да стане прва жртва на „нуклеарна уцена“. Таа предупреди дека наместо да го финансираат украинскиот воен напор, европските држави мора да го запрат Зеленски, зашто неговата политика не води кон мир.
Иако украинскиот лидер во последно време неколку пати повика на преговори за прекин на огнот, Кремљ инсистира на строги услови – предавање на дополнителни територии – пред да се разговара за мир.
Захарова ги отфрли и изјавите на германскиот канцелар Фридрих Мерц, кој спомна можност Украина да отстапи дел од својата земја за да се постигне договор. Според неа, Европа нема реална улога во преговарачкиот процес, а нивните коментари се „бесмислени“.
Во своите забелешки таа ги спомна и Бугарија и Турција, членки на НАТО, кои според Москва имаат заедничка одговорност за еколошките последици од нападите на Киев врз руското пристаниште Туапсе. Нападите со дронови таму предизвикаа пожари и излевање на нафта во Црното Море, што дополнително ја усложнува ситуацијата.
Оваа реторика уште еднаш ја покажува длабоката поделба меѓу Москва и Киев, со Европа во средина – загрижена за можни последици од ескалацијата.
