Од октомври, австралиските плажи се соочуваат со необичен и загрижувачки феномен – морски змии, мртви или едвај живи, масовно се исфрлаат на песокот каде што обично се одмараат туристите и локалното население. Истражувачите се збунети за причината: зошто токму сега и зошто толку многу змии?
Според Одделот за биодиверзитет, заштита и атракции, само во заливот Нанга во Западна Австралија веќе се пронајдени петнаесет мртви морски змии. Локалните жители во Карнарвон, 900 километри северно од Перт, исто така алармираат за насукани змии и мртви желки.
Жителката Шона Кершо за ABC News изјави дека само на плажата Пеликан Поинт во рок од два месеци забележала 20 мртви морски змии. „Понекогаш тие се уште се живи и само изгледаат како да се одмараат. Навистина изгледаат малку измачени“, додаде таа.
Истражувачите предупредуваат дека морските змии се меѓу најотровните морски суштества и дека не треба да се допираат. Иако нападите врз луѓето се ретки, животните се срамежливи и повеќето од 20-те видови кои живеат во северните австралиски води се заштитени, а два вида се загрозени со истребување.
Сè уште не е јасно зошто толку многу змии се насукани. Одделот за климатски промени и енергија наведува дека морските змии често се фаќаат како случаен улов, додека истражувачката Бланш д’Анастази смета дека екстремните временски услови ги отфрлаат животните од нивните природни патеки. „Знаеме дека морските змии не се справуваат добро со силни временски настани; тие се заглавуваат во морската трева исфрлена по циклонот“, изјави таа.
Масовни излевања на морски змии се случувале и претходно. По смртоносниот топлотен бран во 2010 година во Заливот Шарк, локалната популација на морски змии се намалила за 76 проценти.
