Најмалку едно лице загина, а повеќе се повредени во нов бран руски напади врз енергетската инфраструктура на Украина што се случија во текот на ноќта, потврдија украинските власти.
Министерката за енергетика, Светлана Гринчук, соопшти дека Русија повторно започнала масовни воздушни напади насочени кон клучните енергетски објекти, што довело до итни прекини на електричната енергија во повеќе региони низ земјата.
„Непријателот повторно ја гаѓа енергетската инфраструктура на Украина. Како резултат на нападите, делови од државата се соочуваат со сериозни рестрикции на струја“, објави Гринчук на својата страница на „Фејсбук“.
Во источниот град Днепар, беспилотно летало погодило деветкатна зграда, при што загинала една жена, а шест лица биле повредени, соопштија службите за итни интервенции.
Истовремено, во Харков и Сум биле пријавени неколку експлозии, додека во Одеса, нападите предизвикале сериозни оштетувања на енергетската инфраструктура, што остави дел од градот во темнина.
Украинските власти предупредуваат дека ситуацијата останува нестабилна, а екипите работат на обнова на електричната мрежа и расчистување на урнатините.
Овој нов напад доаѓа во момент кога температурите во Украина нагло паѓаат, што предизвикува дополнителна загриженост за грејната сезона и снабдувањето со енергија во погодените области.
