Вистинска драма се случи во кавадаречкото село Сопот, каде што беа пронајдени остатоци од човечко тело, потврдија од СВР Велес.
Случајот бил пријавен вчера околу 16:40 часот во ОВР Кавадарци, по што веднаш на местото пристигнала увидна екипа заедно со јавен обвинител. Според официјалното соопштение, останките биле пронајдени во атарот на селото, но засега не се познати ниту идентитетот, ниту причината за смртта.
По наредба на јавен обвинител, пронајдените човечки остатоци се предадени на обдукција и ДНК анализа, со цел да се утврди на кого припаѓаат и како настапила смртта.
Полицијата не открива дополнителни детали, но според првичните информации, областа е целосно обезбедена, а истрагата продолжува во насока на можен насилен чин или исчезнато лице од регионот.
Жителите на селото се во шок по морничавото откритие, а локалните власти најавуваат дека ќе бидат испитани сите можни траги и сведоштва, за да се открие што точно се случило во Сопот.
