Кризниот состанок со политичките партии што го организираше францускиот претседател Емануел Макрон не донесе напредок во преговорите со левицата, оставајќи ја земјата во подлабока политичка криза пред очекуваното назначување на нов премиер.
Лидерката на Зелените, Марин Тонделиер, по состанокот кој траеше речиси два и пол часа, изјави дека „заминуваме без никаков одговор на ништо, освен ако следниот премиер кој треба да биде назначен во наредните часови не е од нашиот политички табор (левицата)“. Таа предупреди дека „сето ова ќе заврши многу лошо“, алудирајќи на можност за распуштање на парламентот.
Оливие Форе, лидерот на социјалистите, истакна дека нема „јасен одговор“ од Макрон и побара назначување на премиер од редовите на нивната партија.
Претседателот Макрон најави дека до петок навечер ќе именува нов премиер, откако сегашниот премиер Себастијан Лекорну поднесе оставка во понеделник. Сепак, политичките разлики и одбивањето на Макрон да именува премиер од левицата дополнително ја продлабочуваат кризата во францускиот парламент.
