Потврдена прва епидемија на птичји грип во Бразил – Кина го суспендира увозот на живина
Министерството за земјоделство и сточарство на Бразил денеска официјално ја потврди првата епидемија на птичји грип во земјата, соопштувајќи дека вирусот е детектиран во објект за живинарство во јужната сојузна држава Рио Гранде до Сул.
Властите веднаш активирале план за итни ситуации со цел спречување на ширењето на болеста, заштита на домашното снабдување со живинско месо и гарантирање на безбедноста на храната.
Министерот за земјоделство, Карлос Фаваро, изјави дека Кина – еден од најголемите трговски партнери на Бразил – донела одлука за 60-дневна суспензија на увозот на живина од земјата.
Од Министерството потенцираат дека вирусот не се пренесува преку консумирање на живинско месо или јајца, додавајќи дека ризикот од инфекција кај луѓето е низок и најчесто се јавува кај лица кои ракуваат директно со птици, особено ако се заразени или веќе угинале.
Бразилските власти веќе ја информирале Светската организација за здравје на животните, како и трговските партнери, за новонастанатата ситуација.
