Турскиот танкер за транспорт на сурова нафта „Altura“, кој испловил од Русија со товар од 140.000 тони нафта, бил погоден од дрон во Црно Море, на околу 24 километри од брегот кај Босфор.
Според извештаите, бродот претрпел сериозни оштетувања на палубата и во машинскиот простор, при што дошло и до продор на вода. За време на инцидентот се случила и силна експлозија, што дополнително ја влошило ситуацијата на танкерот.
На местото веднаш биле испратени тимови од турската крајбрежна стража, службите за безбедност на пловидбата, како и специјализираниот брод за итни интервенции „Nene Hatun“, кој е опремен за спасување, гаснење пожари и справување со евентуални излевања на нафта.
И покрај драматичниот инцидент, здравствената состојба на екипажот е стабилна – сите 27 турски морнари не се повредени.
Бродот „Nene Hatun“ располага со можности за итна медицинска помош, изведување нуркачки операции до длабочина од 100 метри, спасување и згрижување на преживеани од бродоломи, како и транспорт со хеликоптер, што го прави клучен во вакви кризни ситуации.
Засега, официјалните власти не потврдиле дали станува збор за намерен напад, што остава простор за дополнителни истраги и неизвесност околу причините за овој сериозен инцидент.
