Министерството за национална одбрана на Романија соопшти дека воен дрон, кој бил пренасочен од украинската противвоздушна одбрана, се урнал на територијата на земјата, на околу четири километри во внатрешноста на националниот воздушен простор.
Според официјалните информации, Русија во текот на ноќта извршила нов бран напади со дронови врз цивилни и инфраструктурни цели во Украина, конкретно во северниот дел на округот Тулча, во близина на границата.
Како реакција на ситуацијата, романското воено воздухопловство подигнало два борбени авиони F-16 Fighting Falcon во 00:16 часот од 86-та воздухопловна база во Борча, со цел внимателно следење на воздушниот простор и можните закани.
Околу 00:44 часот, дронот – кој претходно бил оттурнат од украинската одбрана – навлегол во романскиот воздушен простор и се урнал на околу два километри од селото Парче, надвор од населено подрачје.
На местото веднаш биле испратени екипи од Министерството за одбрана и Романска разузнавачка служба, кои пронашле изгорена вегетација и остатоци од леталото. Според досегашните информации, нема пријави за жртви или материјална штета, но областа е обезбедена и започната е детална истрага од специјализирани тимови.
Во текот на ноќта, најмалку 10 граѓани се јавиле на итниот број 112, пријавувајќи силни детонации кои се поврзуваат со нападите врз украинските градови во близина на границата.
Жителите на северниот дел од округот Тулча добиле и предупредување преку системот RO-ALERT, со кое биле информирани за можност од пад на објекти од воздушниот простор, што дополнително ја зголемило вознемиреноста во регионот.
