Европската централна банка (ЕЦБ) ги забрзува подготовките за воведување на дигиталното евро, нов облик на европската валута што би овозможил плаќање преку мобилни апликации, интернет, но и без интернет-врска.
Како што пренесува хрватскиот портал „Пословни“, ЕЦБ избрала два меѓународни конзорциума кои ќе бидат задолжени за развој на мрежната инфраструктура на идниот систем.
Првиот го сочинуваат италијанската компанија „Nexi“ и „Deutsche Telekom Business Solutions“, додека вториот го предводат „Telefónica“ и технолошката компанија „Indra“.
Нивната задача ќе биде поврзување на банките, финансиските институции и националните централни банки со платформата за дигиталното евро.
Тестирањето започнува во 2027 година
Според плановите, во втората половина на 2027 година треба да започне 12-месечен пилот-проект, во кој ќе учествуваат 36 банки и други даватели на платежни услуги од еврозоната.
Во текот на тестирањето ќе се проверува функционирањето на плаќањата во продавници, интернет-трансакциите и префрлањето пари меѓу граѓаните.
Една од најважните новини е можноста за плаќање без интернет-врска, што би овозможило користење на дигиталното евро и во ситуации кога нема мрежна поврзаност.
Дали дигиталното евро ќе ги замени банкнотите?
Од Европската централна банка нагласуваат дека дигиталното евро нема да ги замени банкнотите и монетите, туку ќе претставува дополнителен начин на плаќање.
Граѓаните би можеле да го користат преку банкарските апликации или преку посебна апликација за дигиталното евро.
Проектот предвидува и мерки за заштита на приватноста, особено кај плаќањата без интернет, каде што информациите за трансакцијата би биле достапни само за испраќачот и примачот.
Можно воведување во 2029 година
ЕЦБ има цел да биде технички подготвена за евентуално воведување на дигиталното евро во 2029 година.
Сепак, конечна одлука за негово издавање сè уште не е донесена. Таа ќе зависи од усвојувањето на потребната европска законска регулатива и одлуката на Управниот совет на ЕЦБ.
Една од главните цели на проектот е Европа да ја намали зависноста од платежни системи надвор од Европската Унија и да воспостави сопствена инфраструктура за дигитални плаќања.
