Новата царина од 50% на увозот на бразилско кафе во САД, која треба да стапи на сила од 1 август, предизвикува големи турбуленции на глобалниот пазар. Трговците брзаат да испорачаат што повеќе кафе пред да почне да важи тарифата, со пренасочување на бродови и залихи од Канада и Мексико директно кон САД.
Царината ја зголемува цената на кафето за американските потрошувачи, кои ќе плаќаат значително повеќе. Американските увозници веќе ги вметнуваат дополнителните трошоци во цените, што претставува сериозна закана за домашните бизниси. Бразил е најголем увозник на кафе во САД и ја обезбедува третина од пазарот, додека САД произведуваат само околу 1% од потребното кафе.
Новата царина ја нарушува оваа рамнотежа, а бразилските кооперативи веќе не се во можност да склучуваат договори за испораки по 1 август. Ова може да доведе до глобално пренасочување на пазарите – бразилското кафе кон Европа и Азија, а САД кон Африка и Јужна Америка, што е скапо и комплицирано.
Цените на кафето веќе пораснаа, со арабика која од почетокот на годината поскапе за 25%, а робуста за 10%. Во последните две години, цените дури двојно пораснале. Сушните услови во Бразил дополнително ги намалуваат приносите, а недостатокот на арабика може да трае до 2026 година.
Американската Национална асоцијација за кафе побара администрацијата на Трамп да го изземе кафето од новите трговски мерки, предупредувајќи дека кафето е важен дел од животот и економијата во САД.
Додека не се промени одлуката, американските потрошувачи ќе плаќаат повисоки цени и ќе ја чувствуваат цената на геополитичките тензии со секоја шолја кафе.
