Во првиот месец по воведувањето на првата светска забрана за користење социјални мрежи од лица помлади од 16 години, австралиските компании за социјални медиуми деактивирале речиси 5 милиони профили на тинејџери. Според интернет-регулаторот, ова покажува дека мерката имала брз и значаен ефект.
Комесарката за интернет-безбедност, Џули Инман Грант, изјави дека досега се отстранети околу 4,7 милиони сметки во сопственост на малолетници, со цел усогласување со законот што стапи на сила на 10 декември. Некои платформи започнале со затворање на профили уште неколку недели пред рокот, за да ги избегнат казните кои може да достигнат 33 милиони долари.
Компанијата „Мета“ пријавила дека отстранила околу 550.000 профили на Инстаграм, Фејсбук и Тредс, додека другите големи платформи како Јутјуб, ТикТок, Снепчет и Икс исто така ги почитуваат новите правила. Сепак, некои платформи, како „Редит“, поднесле тужба против владата, барајќи укинување на забраната.
Комесарката нагласила дека целосна усогласеност ќе биде постигната постепено, бидејќи е потребно време за воспоставување ефикасни системи за проверка на возраст. Владата веќе забележала почетни миграциски трендови, но тие не се претвориле во долгорочно користење на алтернативни апликации.
Ефектите од мерката, особено врз менталното здравје и навиките на тинејџерите, ќе бидат следени во повеќегодишна студија, а досегашните резултати покажуваат дека забраната ги постигнува посакуваните цели во намалување на присуството на малолетници на социјалните мрежи.
