Штрајк на вработените ја затвори Ајфеловата кула во Париз, откако се појавија тврдења дека од дел од вработените жени било побарано да се повлечат од своите работни места за време на посетата на хиндуистичка верска група.
Според информациите, околу 100 членови на глобалната хиндуистичка организација BAPS ја посетиле познатата париска знаменитост во саботата. Синдикалната претставничка Дијан Давоан изјавила дека за време на посетата од жените било побарано да ги напуштат своите позиции и на нивно место да бидат поставени мажи.
Токму овој случај предизвикал силно незадоволство кај вработените, кои одлучиле да стапат во штрајк.
„Вработените апсолутно не го прифаќаат тоа, а особено жените, кои се чувствуваат понижено поради она што се случило и начинот на кој некои од нив биле третирани“, изјавила Давоан.
Градоначалникот на Париз, Емануел Грегоар, соопштил дека е покрената истрага за случајот и нагласил дека ваквите услови се неприфатливи.
Компанијата SETE, која управува со Ајфеловата кула, потврдила дека делегацијата побарала посетата да биде организирана со ограничени „интеракции со жени“. Од компанијата признале дека таквите услови не требало да бидат прифатени.
Од BAPS, пак, соопштиле дека сериозно ги сфаќаат реакциите и дека посетата била организирана во координација со тимот на Ајфеловата кула. Организацијата упатила и извинување за евентуалната болка или непријатност предизвикана од случајот.
Инцидентот предизвика реакции и надвор од Франција, а дел од јавноста го поставува прашањето зошто управата воопшто прифатила услови што би значеле различен третман на вработените врз основа на полот.
