Илјадници жители на Газа почнуваат да се враќаат од јужните делови кон север и градот Газа, недели откако беа протерани од интензивната израелска офанзива која го претвори поголемиот дел од градот во урнатини. Видеа и фотографии покажуваат луѓе како пешачат по оштетени крајбрежни патишта, покрај урнати згради и облакодери, носејќи го она што им останало од работите. Некои користат магариња, коли или камиони за да го олеснат патувањето, но повеќето се исцрпени и слаби по месеци раселување, глад и страв.
Враќањето е мотивирано од очај, а не од безбедност. Многумина веќе знаат дека нивните домови се уништени или неупотребливи. Се проценува дека околу 700.000 жители од градот Газа и северните населби се раселени поради воздушни напади и копнени упади од израелските сили, кои го опишаа градот како „последно упориште“ на Хамас.
По повлекувањето на израелските сили во согласност со договорот за прекин на огнот и размена на заложници, северните и западните населби на градот се соочуваат со невиден пустош. Цели станбени блокови се срамнети со земја, стотици домови се уништени, а основната инфраструктура е практично збришана.
Десетици видеа на социјалните мрежи прикажуваат локалното население како шета низ урнатините и документира што останало. „Ова е последната зона до која можеме да стигнеме. Армијата е сè уште блиску. Погледнете го обемот на уништувањето, тие уништија сè“, вели еден жител во видео што циркулира на интернет.
Во меѓувреме, други помагаат на тимовите за цивилна заштита на Хамас да ги извлечат телата од урнатините. „Во петок наутро извлековме осум тела од северна Газа“, изјави портпаролот Махмуд Басал, додавајќи дека спасувачките екипи сè уште пребаруваат со многу ограничени ресурси.
