Рускиот претседател Владимир Путин и српскиот претседател Александар Вучиќ ќе имаат официјална средба за време на престојот на Путин во Кина, потврди помошникот на рускиот лидер Јуриј Ушаков.
Путин ќе престојува во Кина од 31 август до 3 септември, каде што ќе учествува на самитот на ШОС во Тјенџин и на свеченостите во Пекинг по повод 80-годишнината од крајот на Втората светска војна. Во рамките на посетата предвидени се повеќе значајни средби – со кинескиот претседател Си Џинпинг, индискиот премиер Нарендра Моди, новоизбраниот ирански претседател Масуд Пезешкијан, турскиот лидер Реџеп Таип Ердоган, узбекистанскиот претседател Шавкат Мирзијоев, како и со Александар Вучиќ.
Главни теми на разговорите ќе бидат односите со САД, ситуацијата околу Украина и продлабочување на руско-кинеската соработка. На состаноците во потесен формат ќе учествува и рускиот министер за одбрана Андреј Белошов, а се разгледува и можноста за билатерална средба со севернокорејскиот лидер Ким Џонг Ун.
Не е исклучена средба и со азербејџанскиот претседател Илхам Алиев, кој исто така ќе присуствува на церемониите во Пекинг. Исто така, најавен е трилатерален состанок меѓу лидерите на Русија, Кина и Монголија.
Руската делегација ќе биде составена од тројца вицепремиери, повеќе од десет министри, директори на државни корпорации и претставници на крупниот бизнис, што укажува на сериозноста и тежината на посетата.
Американскиот претседател Доналд Трамп не е меѓу поканетите гости на овој настан, кој Пекинг го организира со голема помпа и симболика.
