Претседателот на Украина, Володимир Зеленски, на денешниот самит за проширување на Европската Унија испрати недвосмислена порака – Украина ќе се согласи само на полноправно членство во ЕУ, а не на никакви привремени или ограничени форми на интеграција.
„Ако зборуваме за членство во ЕУ, тоа мора да биде полноправно. Ми се чини дека е многу важно да имаме еднакви земји на иста маса“, изјави Зеленски, нагласувајќи дека Украина заслужува место меѓу рамноправните членки на Унијата.
Тој посочи дека вредностите се суштината на европскиот идентитет и дека само земји кои ги делат тие принципи можат да бидат дел од европското семејство.
„Важно е сите членки да делат слични вредности. Не можете да бидете полу-или делумен член на Европската Унија, тоа едноставно не е можно,“ додаде украинскиот претседател.
Со оваа изјава, Зеленски уште еднаш потсети дека Украина не бара компромиси кога станува збор за нејзиниот европски пат и целосната интеграција во Европската Унија.
