Министерството за надворешни работи на Русија соопшти дека од 2022 до 2025 година, економиите на европските земји претрпеле загуби до 1,6 трилиони евра поради антируските санкции. Во соопштението се наведува дека, и покрај „невиден економски притисок“ од западните земји, руската економија покажала висок степен на отпорност и прилагодливост со континуиран и стабилен раст.
Москва тврди дека едностраните мерки на Запад не само што влијаат врз Русија, туку и сериозно ги оштетуваат самите иницијатори на санкциите, попречувајќи го формирањето на праведен и рамноправен полицентричен светски поредок. Според МИД, санкциите се дел од „неоколонијалната политика на колективниот Запад“ чија цел е одржување на доминација и ограничување на независниот развој на земјите од Светското мнозинство.
Во соопштението се нагласува дека Русија заедно со земјите од Светското мнозинство ќе продолжи да се спротивставува на нелегалните еднострани мерки и другите форми на неоколонијализам.
Иако Западот воведе 19 пакети санкции поради настаните во Украина, кои доведоа до зголемување на цените на енергија, гориво и храна, Кремљ оценува дека притисокот е неефикасен. Претставникот на Кремљ, Дмитриј Песков, порача дека санкциите се „оружје со две острици“, додавајќи дека Русија ги смета овие еднострани мерки за нелегални и се спротивставува на нив.
