Тажна вест ја потресе медиумската заедница во Куманово, откако беше објавено дека починала Линда Ѓулер, новинарка, телевизиска водителка и хуманитарка, која со својата долгогодишна работа остави препознатлив белег во медиумите и хуманитарните активности.
Ѓулер потекнуваше од Куманово, а последните години од својот живот живееше и работеше во Истанбул, Турција.
Веста за нејзината смрт беше објавена на 22 октомври, а од неа со емотивни зборови се простија поранешните колеги од телевизијата „NEWS“ во Куманово.
Во текот на својата професионална кариера, Ѓулер работеше во Радио Албана и телевизијата „NEWS“, каде што беше дел од повеќе медиумски проекти и телевизиски емисии.
Особено ќе остане запаметена по својот ангажман во радиото „АС-ХАНА“ во Куманово, каде што во периодот од 1996 до 1997 година водеше детска радиоемисија.
Со својот препознатлив глас, топлина и посветеност, таа остави спомени кај генерации слушатели кои растеа со нејзините емисии.
Покрај новинарската професија, Линда Ѓулер беше позната и по својата хуманитарна работа, преку која им помагаше на луѓето на кои им беше потребна поддршка.
Таа беше активна и во промовирањето на албанскиот јазик и култура меѓу албанската заедница во Турција.
Нејзините поранешни колеги ја опишуваат како посветена професионалка, хумана личност и жена која со својата добрина оставила трага во животите на многумина.
Од телевизијата „NEWS“ упатија искрено сочувство до семејството Ѓулер, истакнувајќи дека нејзиниот придонес во медиумите и хуманитарната работа нема да биде заборавен.
Причината за смртта не е наведена во објавеното соопштение.
