Сателитски снимки откриваат дека американската војска се наоѓа на помалку од 200 километри од брегот на Венецуела, изведувајќи интензивни воени вежби во Карипското Море, објави Sky News. Овој потег предизвика загриженост во Каракас, каде експертите предупредуваат дека може да се толкува како директна провокација кон режимот на Николас Мадуро.
Поранешниот полковник и воен аналитичар Марк Кансијан изјави дека Мадуро би можел да ја сфати оваа операција како „тактика за заплашување“, со оглед на тоа што американските сили во последниве недели се приближуваат сè повеќе до венецуелските територијални води.
Според потврдените снимки на Sky News, амфибискиот јуришен брод USS Iwo Jima бил забележан додека изведувал вежби со боева стрелба, придружуван од два разорувачи, на само неколку десетици километри оддалеченост еден од друг. Овој тип бродови има способност за амфибиски операции, што значи дека може да пренесува војници и тешка техника директно на копно – сигнал што Венецуела сигурно не го игнорира.
Напнатоста дополнително се зголеми по објавата дека носачот на авиони „USS Gerald R. Ford“ е распореден во регионот, заедно со уште три воени разорувачи. Иако оваа ударна група располага со високотехнолошки авиони „F/A-18“ и „F-35“, аналитичарите укажуваат дека не е најсоодветна за операции против нелегалната трговија со дрога, бидејќи таквите мисии бараат брзина и прецизност во идентификација на мали чамци – нешто што големите носачи тешко го постигнуваат.
Истовремено, податоците од системите за следење на летови покажуваат зголемена воздушна активност на САД над Карипите. Забележани се бомбардери „B-1“ и „B-52“ во близина на венецуелскиот брег, како и шест „F-35B“ борбени авиони во Порторико на 17 октомври.
Овој раст на воена активност во регионот се случува во време на зголемени тензии меѓу Вашингтон и Каракас, што отвора прашања дали станува збор за обична воена вежба или стратегиска демонстрација на сила со порака кон Мадуро.
