Индискиот премиер Нарендра Моди отпатува во Кина за самитот на Шангајската организација за соработка (ШОС), прв пат по седум години, каде се сретна со кинескиот претседател Си Џинпинг. Си истакна дека „Светот се движи кон трансформација“ и дека Кина и Индија, како најмоќни и најнаселени цивилизации, мора да ја зајакнат соработката. „Време е Змејот и Слонот да се обединат“, рече Си, нагласувајќи дека добрососедските односи се од витално значење.
Претседателот на Кина додаде дека двете земји имаат историска одговорност да поддржуваат мултилатерализам, мултиполарен свет и поголема демократија во меѓународните институции, со цел мир и просперитет во Азија и ширум светот.
Моди, од своја страна, истакна дека Индија е посветена на развивање на односите со Кина врз основа на меѓусебна доверба и почитување. Благосостојбата на 2,8 милијарди луѓе, според него, е тесно поврзана со билатералната соработка. Индискиот премиер најави и враќање на директниот воздушен сообраќај со Кина, како и дека на границата со Хималаите е воспоставена атмосфера на мир и стабилност, по воениот конфликт од 2020 година.
Самитот на ШОС продолжува денес и утре, со фокус на економска, политичка и безбедносна соработка меѓу земјите-членки.
