Светската фудбалска централа сериозно размислува за ново правило што може целосно да ја промени комуникацијата на теренот – санкции за играчи кои разговараат со противници со покриена уста. Повод за оваа иницијатива беше ситуацијата меѓу Џанлука Престијани и Винисиус Жуниор за време на мечот меѓу Бенфика и Реал Мадрид во Лигата на шампионите.
Темата ја отвори поранешниот француски репрезентативец Микаел Силвестр, кој е дел од панелот „Гласот на играчите“ при ФИФА. Според него, кога прикривањето на устата се користи за навреди или ширење омраза, тоа не смее да остане неказнето. Идејата е да се направи јасна разлика меѓу тактичка комуникација и недозволено однесување.
Сепак, евентуалните санкции нема да се воведат преку ноќ. Ќе биде потребна координација со судиите и јасни докази за да може некој играч да биде дисциплински гонет. Проблемот е што ваквите ситуации често се случуваат надвор од аудио и видео доказите, што ја прави истрагата комплицирана.
Панелот „Гласот на играчите“, формиран минатата година, има задача да ја советува ФИФА во борбата против расизмот и говорот на омраза. Во него членуваат поранешни ѕвезди од различни континенти, со цел глобален пристап кон проблемот.
Доколку ова правило стане реалност, фудбалерите ќе мора двапати да размислат пред да ги покријат устите – затоа што зад гестот може да следи сериозна казна.
