Силна снежна бура проследена со дожд ја погоди Романија, оставајќи зад себе сериозни последици. Околу 200.000 домаќинства останаа без електрична енергија, додека сообраќајот во повеќе делови од земјата е во сериозен застој.
Голем број автопати и регионални патишта се блокирани поради наноси од снег и паднати дрвја. Железничкиот сообраќај функционира со значителни доцнења, а службите на терен работат на расчистување на критичните делници.
Во главниот град Букурешт снежната покривка достигна и до 40 сантиметри, што предизвика прекини и отежнато функционирање на јавниот превоз. Поради екстремните временски услови, наставата е суспендирана во повеќе градови, а здравствените служби се соочуваат со сериозни предизвици. Според извештаите, десет амбулантни возила останале заглавени во снегот во шест окрузи.
Надлежните институции информираат дека електричната енергија е повторно воспоставена за околу 86.000 домаќинства, но стотици населени места и натаму се соочуваат со прекини. Екипите за итни интервенции работат во засилено темпо за нормализирање на состојбата.
Од властите апелираат граѓаните да избегнуваат непотребни патувања и да ги следат официјалните препораки додека трае невремето. Синоптичарите предупредуваат дека нестабилните услови може да продолжат и во наредните часови, што значи дека ситуацијата останува сериозна низ целата земја.
