Во Бутел се започна со реализација на мерката за финансиска поддршка на новороденчиња, со што се потпишани првите решенија за исплата на надоместок во износ од 5.000 денари.
Оваа мерка е дел од Програмата за социјална заштита за 2026 година и има за цел да им обезбеди директна помош на младите семејства веднаш по раѓањето на дете, како дел од поширока стратегија за демографска и социјална поддршка.
Од општината нагласуваат дека ова е само еден сегмент од пошироките активности насочени кон подобрување на условите за живот на младите семејства во Бутел, при што се работи и на долгорочни инфраструктурни проекти.
Паралелно со финансиската поддршка, се реализира и изградба на нови детски градинки. Во тек се активности за објекти во Бутел 1 и Бутел 2, а во план е изградба на дополнителни три градинки во Радишани, Визбегово и повторно во Бутел 1.
Целта на овие активности е создавање подобри услови за згрижување и воспитување на децата, како и олеснување на секојдневниот живот на родителите.
Од Општина Бутел порачуваат дека визијата останува јасна – континуирано инвестирање во инфраструктура, социјална поддршка и услови за стабилен развој на секое семејство и секое дете во општината.
