Јавното претпријатие за државни патишта започна постапка за подготовка на документацијата за изградба на нов експресен пат што ќе ги поврзува Радовиш, Струмица и Ново Село со граничниот премин кон Бугарија.
Во првата фаза ќе биде избрана проектантска и консултантска компанија која треба да изработи техничка документација, физибилити студија и еколошки и социјални анализи. Откако документацијата ќе биде завршена и одобрена, ќе може да се распише тендер за избор на компанија што ќе ја изведува изградбата.
Новиот пат треба да претставува продолжение на веќе изградениот експресен пат од Штип до Радовиш. Планот е трасата да продолжи преку Струмица и Ново Село и директно да стигне до македонско-бугарската граница.
Изградбата, според најавите, ќе се финансира со сопствени средства на Јавното претпријатие за државни патишта.
Паралелно со патната инфраструктура, во струмичкиот регион се планираат и други проекти, меѓу кои изградба на систем за атмосферска канализација во Просениково, вреден 46,6 милиони денари.
