Се сеќавате ли без што не можевте да го замислите секојдневието пред телефонот да ни стане сопатник дури и во тоалетот (секогаш и секаде)? Кога на училиште и на факултет се одеше со тетратки и скрипти, а фиксните телефони на најдобрите другари ги знаевме напамет? За физичкиот контакт и дружењето „во живо“ да не зборуваме.
А можете ли да претпоставите без што не може генерацијата Зет (Gen Z)? Одговорот е – без вештачка интелигенција! Ова го открива првото регионално истражување за односот на генерацијата Зет кон вештачката интелигенција, симболично наречено „Алатка, играчка или тројански коњ?“.
Истражувањето покажува дека повеќе од 80% од младите ја користат вештачката интелигенција секојдневно, но – сега обрнете внимание – главно не ѝ веруваат безрезервно. Дури речиси 90% од нив тврдат дека би можеле да функционираат и без неа!
Разбивање на предрасудите за генерацијата Зет
За припадниците на генерацијата Зет постои вообичаено мислење дека животот им се сведува на скролање, алгоритми и апликации. Меѓутоа, овие предрасуди се разбиваат кога на работите ќе се погледне од друг агол – реален и научен.
