Администрацијата на американскиот претседател Доналд Трамп врши притисок врз Apple да не набавува мемориски чипови од кинески производители, во период кога технолошката индустрија се соочува со недостиг и раст на цените.
Американскиот министер за трговија Хауард Латник порача дека Вашингтон не сака американските компании да зависат од кинеска меморија и дека Apple треба да бара други решенија.
„Мора да има други решенија за проблемот со меморијата, но не е добра идеја американските компании да користат кинеска меморија“, изјави Латник, додавајќи дека ставот на администрацијата му бил јасно пренесен на Apple.
Apple разгледува повеќе опции
Недостигот на мемориски чипови е поттикнат од огромната побарувачка поврзана со изградбата на центри за податоци за вештачка интелигенција. Тоа доведе до зголемување на цените и дополнителен притисок врз производителите на електроника.
Според медиумските информации, Apple веќе тестирал мемориски чипови од кинеските CXMT и YMTC, кои потенцијално би можеле да се користат во уредите наменети за кинескиот пазар.
Главниот оперативен директор на Apple, Саби Кан, не потврдил дека компанијата ги тестира овие производи, но признал дека поради недостигот мора да се разгледуваат различни можности.
Вашингтон сака поголемо производство во САД
Администрацијата на Трамп истовремено настојува поголем дел од производството на полупроводници и други клучни компоненти да се врати во САД.
Во притисокот врз Apple се вклучил и американскиот производител Micron Technology, кој побарал компанијата да не користи кинески мемориски чипови. Аргументот е дека таквиот потег би можел да му наштети на домашното производство на полупроводници.
Недостигот, сепак, не го погодува само Apple. Со слични проблеми се соочуваат компании од автомобилската, медицинската и други индустрии, а изградбата на нови производствени капацитети бара време.
И покрај притисокот од Вашингтон и најавените американски инвестиции, голем дел од синџирот за снабдување на Apple и понатаму е концентриран во Азија.
