Голема француска студија спроведена на речиси 30 милиони возрасни лица потврди дека вакцините против Ковид-19 не доведоа до зголемена стапка на смртност. Напротив, резултатите покажуваат дека ризикот од смрт во четиригодишен период е околу 50 проценти поголем кај невакцинираните луѓе во споредба со вакцинираните, објави „РФИ“.
Истражувањето, објавено во научното списание „Џама Нетворк Оупен“, го спровела француската епидемиолошка група „Епи-Фаре“. Податоците биле собрани од 2021 до 2025 година и опфатиле речиси 30 милиони возрасни на возраст од 18 до 59 години. Од нив, околу 23 милиони примиле барем една доза од вакцината, додека 6 милиони останале невакцинирани.
Резултатите покажале дека во текот на четиригодишниот период починале 0,4 проценти од вакцинираните лица, додека кај невакцинираните стапката на смртност била 0,6 проценти – што значи приближно 50 проценти повисока. Огромното мнозинство од примените дози биле мРНА вакцини од „Модерна“ и „Фајзер“.
Авторите на студијата истакнале: „Вакцините со мРНА против Ковид-19 не го зголемуваат долгорочниот ризик од смрт од која било причина.“ Махмуд Зуреик, кој го надгледувал истражувањето, додаде: „Можеме да кажеме со висок степен на сигурност дека нема зголемен ризик од смртност по вакцинацијата.“
Истражувањето, според Зуреик, е клучно за разбирање на долгорочните ефекти на вакцините. „Имавме цврсто разбирање за краткорочниот профил на корист и ризик, но долгорочната корист никогаш не беше проучена.“
Резултатите ја опровергуваат дезинформацијата која долго време циркулираше на социјалните мрежи дека мРНА вакцините предизвикуваат „скриен бран на смрт“. Иако ретки и познати сериозни несакани ефекти постојат, оваа студија нуди важен увид во долгорочната безбедност на вакцините.
Сепак, истражувачите нагласуваат дека студијата не докажува директна причина-за-последица врска помеѓу вакцинацијата и намалувањето на смртноста. Разликите може да се должат и на демографски и социјални фактори, како што се возраста или социоекономскиот статус.
