Двајца кардиохирурзи од ЈЗУ Клиниката за кардиохирургија – Скопје, д-р Александар Колев и д-р Кујтим Џелили, престојуваат во Универзитетската болница во Бордо, Франција, каде што се обучуваат за најсовремените техники во кардиохирургијата.
Под менторство на професорите Томас Модин, Луис Лаброус и Џулијан Пелтан, тие минуваат интензивна обука за минимално инвазивни интервенции и употреба на роботскиот систем „Да Винчи“ при поправка на митралниот залисток — технологија што значително ја намалува траумата, времето на опоравување и ризикот од компликации.
Во текот на престојот, македонските лекари учествуваат во практични тренинг-сесии со реални модели и најнова медицинска опрема која се користи во водечките европски центри.
„Кардиохирургијата постојано напредува и наша обврска е да бидеме во тек со новите методи, за нашите пациенти да добијат врвна здравствена грижа и во Македонија,“ изјави д-р Колев.
Оваа обука е дел од континуираната програма за модернизација на македонското здравство, насочена кон подигање на стандардите и воведување напредни хируршки техники на домашните клиники.
