Научници од Универзитетот во Калифорнија во Сан Франциско и Институтот „Гладстон“ објавија резултати од истражување кои отвораат нова можност во борбата против Алцхајмеровата болест. Според нивните наоди, два веќе постоечки лекови што се користат во онкологијата покажале потенцијал да влијаат врз процесите поврзани со оваа тешка невродегенеративна болест.
Станува збор за лековите летрозол, кој најчесто се применува кај пациенти со рак на дојка, и иринотекан, кој се користи во третман на одредени форми на рак на дебело црево и белите дробови.
Истражувачите користеле напредна компјутерска анализа за да утврдат кои постоечки лекови би можеле да ги намалат промените што Алцхајмеровата болест ги предизвикува во мозочните клетки. Токму оваа анализа ги издвојила летрозолот и иринотеканот како најперспективни кандидати.
Во лабораториски тестови и експерименти врз глувци со симптоми слични на Алцхајмерова болест, комбинацијата на двата лека довела до намалување на штетните тау-протеини во мозокот. Истовремено биле забележани подобрувања во меморијата и способноста за учење кај животните.
Сепак, научниците предупредуваат дека резултатите се уште не значат дека е пронајден лек за Алцхајмер. Пред евентуална примена кај луѓе потребни се дополнителни клинички испитувања за да се утврдат безбедноста и ефикасноста на ваквиот пристап.
Фактот што станува збор за веќе одобрени лекови може значително да го забрза процесот на понатамошни истражувања. Алцхајмеровата болест денес погодува милиони луѓе ширум светот, па секое ново научно откритие што нуди можност за подобар третман привлекува големо внимание во медицинската заедница.
Иако патот до потенцијална терапија е долг, истражувањето носи нова надеж дека постоечките лекови еден ден би можеле да добијат сосема нова улога во лекувањето на оваа сериозна болест.
