Нов случај на врсничко насилство бил пријавен во Тетово, откако малолетник бил физички нападнат од тројца негови соученици, а според пријавата бил употребен и метален предмет.
Од СВР Тетово информираат дека случајот бил пријавен синоќа од 49-годишниот З.Б. од Тетово, кој навел дека неговиот малолетен син бил нападнат околу 9 часот наутро.
Инцидентот, според информациите од полицијата, се случил на крстосницата меѓу улиците „Борис Кидрич“ и „Јане Сандански“, каде тројца ученици физички го нападнале малолетникот.
Во пријавата е наведено дека при нападот бил употребен и метален предмет, што дополнително ја зголемило сериозноста на случајот.
Од полицијата велат дека веќе се преземаат мерки за целосно расчистување и документирање на инцидентот. Во постапката, покрај полициските службеници, се вклучени и родителите, како и претставници од Центар за социјални работи.
Надлежните институции работат на утврдување на сите околности поврзани со случајот, како и на причините што довеле до инцидентот меѓу малолетниците.
