Општина Велес распиша конкурс за стипендирање талентирани ученици и студенти за учебната, односно студиската 2026/2027 година. Вкупно ќе бидат доделени 34 стипендии за млади кои постигнале значајни резултати во образованието, науката, техниката, културата, спортот и други области.
Конкурсот го распиша Комисијата за стипендирање на талентирани ученици и студенти при Советот на Општина Велес на 21 октомври 2026 година, врз основа на член 3 од Деловникот за работа на Комисијата („Службен гласник на Општина Велес“ бр. 11/11), член 8 од Правилникот за условите, критериумите и начинот за доделување стипендии („Службен гласник на Општина Велес“ бр. 17/22, 18/22, 16/23 и 17/25), како и Правилникот за изменување и дополнување на правилникот, заведен под број 09-4014/6.
Конкурсот е во согласност со Програмата на Комисијата за стипендирање на талентирани ученици и студенти во Општина Велес за 2026/2027 година, со број 09-4014/7 од 20 октомври 2026 година.
Кој колкав износ ќе добива?
За претстојната учебна и студиска година, Општина Велес предвидува стипендии за две категории кандидати.
- Ученици во средно образование: ќе бидат доделени 19 стипендии за талентирани ученици од втора, трета и четврта година. Месечниот износ е 2.000 денари, а средствата ќе се исплаќаат девет месеци во текот на учебната година.
- Студенти: предвидени се 15 стипендии за талентирани студенти кои имаат завршено најмалку една година од високото образование. Стипендијата изнесува 2.500 денари месечно и ќе се исплаќа девет месеци во текот на академската година.
Средствата за стипендиите ќе бидат обезбедени од Буџетот на Општина Велес, како и преку донации од „Жито маркети“ и „Агриа – Агроиндустриска групација“ ДООЕЛ Велес.
Кои услови треба да ги исполнуваат кандидатите?
Право на аплицирање имаат ученици и студенти кои се образуваат во училишта и факултети во Република Северна Македонија, доколку ги исполнуваат условите утврдени во конкурсот.
За учениците во средно образование се бара да бидат редовни ученици во втора, трета или четврта година и да имаат одличен успех во учебната година што ѝ претходи на годината за која аплицираат. Дополнително, треба да имаат освоено награда на општински, регионални, државни или меѓународни натпревари од областа на науката, техниката, културата, спортот или други области, во претходната учебна година.
Студентите, пак, треба да бидат редовни студенти со најмалку запишана втора година и континуитет во студирањето. Услов е да имаат освоено награда на државен или меѓународен натпревар од областа на науката, техниката, културата, спортот или друга област, како и просечен успех од најмалку 9,00 во текот на студиите.
За двете категории кандидати важат уште два задолжителни услови: да бидат жители на Општина Велес и да имаат државјанство на Република Северна Македонија.
Кои документи треба да ги достават учениците?
Учениците што сакаат да конкурираат за стипендија треба да ја подготват следната документација:
- Пријава од апликантот до Комисијата.
- Свидетелство за претходната учебна година.
- Документ со кој се потврдуваат освоените награди на општински, регионални, државни и меѓународни натпревари во претходната учебна година.
- Докази за учество во хуманитарни акции, семинари, конференции, образовни проекти, благодарници и слични активности во претходната учебна година.
- Изјава заверена на нотар со која барателот се согласува неговите лични податоци да се користат исклучиво за постапката за доделување стипендии.
- Изјава дека сите податоци доставени во целокупната документација се вистинити.
Што треба да достават студентите?
Студентите кои ќе аплицираат за стипендија треба да ја приложат следната документација:
- Пријава од апликантот до Комисијата.
- Уверение за положени испити.
- Потврда од факултетот за запишаната година на студии.
- Документ со кој се потврдуваат освоени награди на државни и меѓународни натпревари.
- Докази за учество во хуманитарни акции, семинари, конференции, образовни проекти, благодарници и слични активности.
- Потврда за објавени стручни трудови.
- Изјава заверена на нотар со која барателот се согласува личните податоци да се користат исклучиво за постапката за доделување стипендии.
- Изјава дека сите податоци доставени со документацијата се вистинити.
Пријавувањето е електронско, а рокот истекува на 9 ноември
Заинтересираните ученици и студенти треба да ги достават пријавите заедно со потребните документи по електронски пат, преку порталот за електронски услуги на Општина Велес: https://euslugi.veles.gov.mk/.
Рокот за поднесување на документацијата е од 21 октомври до 9 ноември 2026 година.
Пријавата и потребните изјави се објавени на официјалната веб-страница на Општина Велес. По завршувањето на постапката, резултатите од конкурсот ќе бидат објавени на општинската веб-страница, а ќе бидат истакнати и на огласната табла во Општинскиот центар за услуги.
За дополнителни информации во врска со конкурсот, заинтересираните кандидати можат да се јават на телефонскиот број 078 342 316.
Конкурсот ќе биде објавен и на веб-страницата и социјалните мрежи на Општина Велес, како и на социјалните мрежи на донаторите. Дополнително, ќе биде истакнат на огласната табла во Општинскиот центар за услуги.
