Сообраќајот на државните патишта во текот на утрото се одвива без поголеми проблеми, а коловозите на патната мрежа се суви.
Надвор од населените места интензитетот на сообраќајот е умерен, додека на граничните премини од македонска страна во моментов нема подолги задржувања ниту при влез, ниту при излез од државата.
Од Авто-мото сојузот на Македонија (АМСМ) упатуваат апел до сите учесници во сообраќајот да бидат внимателни при управувањето со возилата, да ја приспособат брзината според условите на патот и доследно да ја почитуваат поставената сообраќајна сигнализација.
Посебна претпазливост се препорачува при движењето по патиштата кои минуваат низ котлини, речни долини и клисури. На овие места постои можност за појава на одрони, поради што возачите треба да бидат внимателни и да ја приспособат својата брзина.
Зголемено внимание се препорачува и на неколку конкретни патни делници, меѓу кои Катланово–Велес, Маврово–Дебар–Струга, Виница–Берово и Кочани–Делчево.
Во меѓувреме, во согласност со сезонскиот режим на сообраќај, патниот правец Охрид–Ресен, кој минува преку Националниот парк Галичица, од 15 април е отворен за сообраќај за сите видови возила чија најголема дозволена маса е до 3,5 тони.
