Младата ѕвезда на македонскиот мотокрос, Стефан Ѓорѓиевски (14) од Битола, ја заврши 2025 година со сензационален успех, освојувајќи ја титулата шампион на Македонија во класата MX 85. Со сигурно и концентрирано возење, постојани врвни настапи и дисциплиниран пристап, Стефан се истакна како еден од најперспективните млади спортски таленти во земјата.
И покрај младата возраст, тој успева да ги комбинира училишните обврски како ученик во ООУ „Тодор Ангелевски“ – Битола со интензивната спортска кариера. Ѓорѓиевски досега се натпреварува без спонзорска поддршка, вложувајќи сопствени средства, а неговата посветеност и љубов кон мотокросот го доведоа до редица победи и подиуми.
Стефан демонстрира зрелост и професионализам на секоја трка, инспирирајќи многу млади спортисти да ги следат своите соништа. Во иднина, тој се надева на поддршка што ќе му овозможи да се натпреварува и на меѓународната сцена и да продолжи да гради блескава кариера.
