„Сега ми е полесно, душата на мојот сопруг ќе мирува, во вечноста“, напиша Гордана Дренкоска по телевизиското сведоштво во кое проговори за случајот што го промени животот на нејзиното семејство. Таа и нејзиниот сопруг беа осомничени во истрагата за убиството на матичниот лекар Ацо Трповски, а по две и пол години Гордана сè уште бара одговори од надлежните институции.
Дренкоска наведува дека, и покрај тоа што таа и нејзиниот сопруг биле ослободени од притвор поради недостиг од докази, последиците од случајот продолжиле да го оптоваруваат нивното семејство. Според нејзините тврдења, автомобилот и личните предмети сè уште не им се вратени, додека барањата што ги упатила до надлежните институции останале без одговор.
Случајот повторно привлече внимание во јавноста по емисијата на Телма, во која Гордана ја раскажа својата страна од приказната, зборувајќи за апсењето, последиците што ги претрпела и јавната стигматизација со која, како што наведува, се соочила.
Во меѓувреме, нејзиниот сопруг се разболел и починал, а таа продолжила да бара објаснување за случувањата низ кои поминало нивното семејство.
По емитувањето на сторијата, Дренкоска им се заблагодари на сите што ѝ испратиле пораки за поддршка. Сепак, во својата објава упати и директна порака до луѓето од нејзиното опкружување за кои смета дека поверувале во невистините за неа.
„Ама моите браќа, сестри, пријатели, познаници, комшии, колеги, колешки кои поверуваа во таа невистина, сега не ми требаат!“, напиша таа.
Гордана порачува дека продолжува да чекори напред со крената глава, горда на себе и на своето семејство, и покрај сè низ што поминала.
„Јас сум борец жена, која го обели образот на фамилијата, затоа живеам и одам напред, со крената глава, горда и исполнета!“, порача Дренкоска.
Убиството на матичниот лекар Ацо Трповски ја потресе јавноста во март 2024 година. Во рамките на истрагата подоцна биле приведени и други осомничени, додека за Гордана Дренкоска остануваат отворени прашањата за последиците од првичното сомнение, невратениот имот и, како што тврди, молкот на институциите.
Нејзината порака по телевизиското сведоштво е истовремено благодарност до оние што ѝ пружиле поддршка и јасно дистанцирање од луѓето за кои смета дека ја осудиле без да ја знаат целосната вистина.
