Велешанецот со иницијали М.А. (47) со години им нудел на пациенти заболени од рак во Македонија таканаречена „кубанска вакцина“, ветувајќи им надеж за подобрување на здравствената состојба. Според сведоштвата на семејствата со кои разговарал „Слободен печат“, за една доза им наплаќал по 3.200 евра, а инјекциите им ги давал во домовите на пациентите. Сепак, вакцината не е регистрирана во Македонија, а досега не е потврдено што навистина содржеле инјекциите што им ги аплицирал на болните.
„Слободен печат“ разговарал со членови на десетина семејства, од кои повеќето пациенти во меѓувреме починале. Тие раскажале дека парите му ги предавале на различни начини – на бензинска пумпа, на автопат, во плик, но и преку банкарски трансакции.
Според нивните сведоштва, кога ќе пристигнел во домот на пациентот, велешанецот внимавал присутните да не ги видат иглите и амбалажата. Ги криел, како што го опишале соговорниците, „како магионичар“, а одбивал да им го остави пакувањето од наводната вакцина. Поради тоа, семејствата велат дека и денес не знаат каква супстанција примиле нивните блиски.
Медиумот наведува дека располага со разговори меѓу семејствата и велешанецот, како и со банкарски налози за уплати на неговата сметка. Дел од комуникацијата, според објавените информации, покажува дека тој одбил да врати пари на син на жена заболена од рак, откако биле доведени во прашање неговите тврдења за вакцината.
Синот потоа го пријавил случајот во полициската станица во Кавадарци.
Синот тврди дека лабораториската анализа покажала физиолошки раствор
Според сведочењето објавено во „Слободен печат“, синот успеал да дојде до остаток од инјекцијата, во која имало уште неколку капки, и лично ја однел во лабораторија во Србија. Тој тврди дека резултатот од анализата покажал дека во примерокот имало само физиолошки раствор.
Мажот раскажал и дека велешанецот постојано го убедувал оти е во контакт со лекари од Србија, кои ги толкувале резултатите од крвните анализи на неговата мајка. За да ги провери овие тврдења, синот се обратил и во болница во Србија, од каде што, според неговите зборови, добил писмен извештај дека неговата мајка никогаш не била лекувана ниту заведена во таа установа.
Тој тврди дека таму му било кажано оти болницата не лекува рак со такви вакцини и нема посредници во Македонија.
Случајот веќе е предмет на полициско постапување. Од МВР за „Слободен печат“ потврдиле дека на 31 јули 2026 година, по наредба на Основниот суд Велес, полициски службеници извршиле претрес во домот и помошните простории на М.А. (47) од Велес. При претресот бил пронајден и одземен мобилен телефон, кој бил предаден на СВР Куманово за понатамошна постапка.
На 21 август 2026 година, во ОВР Кавадарци, 37-годишен жител на Кавадарци пријавил дека од ноември 2025 година до денот на пријавувањето бил измамен за сума од 3.200 евра. Според пријавата, М.А. го довел во заблуда дека може да му помогне во лекувањето на член од неговото семејство, по што му биле дадени парите.
На 9 септември 2026 година, полициски службеници од СВР Велес извршиле службен разговор со М.А.
„По целосно расчистување и документирање на случајот, ќе биде поднесен соодветен поднесок“, соопштиле од МВР за „Слободен печат“.
Од Основното јавно обвинителство Велес, според истиот медиум, потврдиле дека против велешанецот се води предистражна постапка.
Едно семејство платило 15.000 евра, парите биле собрани од донации
Најголемата сума за која сведочеле соговорниците на „Слободен печат“ изнесува 15.000 евра. Толку платило семејство од Струмица за наводното лекување на свој близок, а средствата биле собрани преку донации во странство. Пациентот починал неколку дена пред објавувањето на сторијата.
Членови на семејството раскажале дека велешанецот неколкупати доаѓал во домот во Струмица каде што престојувал пациентот и му ја аплицирал инјекцијата во рамото, по што веднаш заминувал.
Пациентот подолго време живеел во странство, но се вратил во Македонија за да го добие третманот од човекот за кого семејството тврди дека му дал најмалку три дози од „кубанската вакцина“.
Според нивното сведоштво, во текот на летото, во јули или август, велешанецот ја прекинал комуникацијата со нив. Оттогаш, велат тие, психолошката состојба на пациентот почнала да се влошува, бидејќи надежта ја полагал во наводната вакцина. Во меѓувреме, конвенционален медицински третман за рак не бил спроведуван врз него на Клиниката за онкологија.
Пријател на починатиот пациент изјавил дека велешанецот во март го барал дури и на аеродром, кога пациентот се подготвувал да замине за Ирска, за да му достави половина доза.
„Ако има истрага да ме викнат да сведочам, јас бев во просторијата кога му ја ставаше вакцината“, изјавил пријателот за „Слободен печат“.
Семејство од Битола платило 6.300 евра за две дози
Во Битола, на 25 април и на 5 мај 2026 година, велешанецот дошол во домот на пациент со карцином, кој подоцна починал. Семејството, според сведоштвото на сопругата, платило вкупно 6.300 евра за две инјекции. Првата била платена во готовина, а втората преку трансакциска сметка.
Сопругата раскажала дека уште на почетокот имала сомнеж, но нејзиниот сопруг инсистирал да го прими третманот. Велешанецот, според нејзиното сведоштво, им кажал дека вакцината мора да се аплицира веднаш и дека ќе ја донесе во специјален куфер, на одредена температура.
Кога пристигнал во домот, наместо во таков куфер, ја носел инјекцијата во рака. Жената раскажала дека таа изгледала како ампула, која ја скршил, а потоа со шприц му ја вбризгал содржината на нејзиниот сопруг во рамото.
Пациентот повеќепати барал документација од Србија и потврда дека ја примил вакцината, но никогаш не добил такви документи.
Сопругата навела и дека велешанецот бил многу убедлив во разговорите. Кога нејзиниот сопруг го прашувал зошто му растат вредностите на билирубинот, тој му одговарал дека за една недела ќе почнат да се намалуваат.
Втората инјекција ја примил на 5 мај, а еден месец подоцна починал.
„Ми беше сомнителен. Но мојот сопруг инсистираше да ја прими ‘кубанската вакцина’“, изјавила жената за „Слободен печат“, барајќи нејзиниот идентитет да остане заштитен.
„Знаев дека е измама, но ме убедија да ја примам“
Меѓу соговорниците на медиумот е и жена од Велес која работи во медицинската област и самата ја примила наводната вакцина. Таа раскажала дека знаела оти станува збор за измама, но по сознанието дека има метастази, а под притисок на стравот на луѓето околу неа, сепак се согласила да ја прими инјекцијата.
За дозата, според нејзиното сведоштво, платила 3.000 евра.
Таа опишала дека инјекцијата не била во обичен шприц, туку во амбалажа со клип, а велешанецот ја носел во кафен плик и ја аплицирал во домот на пациентот.
Според нејзините зборови, тој тврдел дека секој пациент добива шифра и дека под таа шифра е заведен во Белград. Кога побарала директно да разговара со лекарите таму, тој не ѝ дозволил и ја избегнувал темата.
Таа раскажала дека на почетокот барал крвна слика, но откако ќе ги добиел парите, повеќе не барал дополнителни анализи.
Во друг случај во Велес, според сведоштвото на ќерката на пациентка, велешанецот понудил пакет што вклучувал половина доза од наводната вакцина и суплементи за зајакнување на имунитетот. Семејството тврди дека суплементите не биле испорачани во целост, но инјекцијата ѝ била аплицирана на жената во рамото.
Ќерката раскажала дека побарала да го добијат шишенцето од вакцината, но велешанецот одбил и го ставил во џебот.
„Му реков да ми го даде шишенцето од вакцината, но рече дека не дава шишенца. Право си ги земаше шишенцата во џебот. И нас уште тогаш ни беше чудно. А парите му ги дадовме во плико. Тоа што не го даваше шишенцето, ми создаде сомнеж дека нешто не е во ред. Зошто го крие?“, изјавила таа за „Слободен печат“.
Семејствата со кои разговарал медиумот рекле дека за велешанецот дознавале од други луѓе кои претходно ја примиле инјекцијата. Сепак, ниту едно од нив, според нивните сведоштва, не стапило во директен контакт со наводните лекари во Белград, со кои велешанецот тврдел дека соработува.
Велешанецот тврди дека вакцината е „Цимивах“
„Слободен печат“ стапил во контакт со М.А. и му поставил прашања за составот и потеклото на инјекцијата, начинот на набавка, регистрацијата кај Агенцијата за лекови и медицински средства (МАЛМЕД), бројот на пациенти на кои им ја аплицирал и сумите што ги наплаќал.
По инсистирањето на новинарите, тој одговорил дека бројот на луѓе на кои им помогнал е многу поголем од бројот на оние што го критикуваат.
„Можам само да ви кажам дека самите пациенти ме бараа после добри резултати, а јас не појдов кај нив ниту сум ги присилил на такво нешто. Вакцината е Цимивах. И ве молам да објавите од кога ќе ви ги кажам сите информации после Обвинителство. Ќе имате ексклузивна изјава со сѐ точно. Би ве замолил до тогаш да не објавувате“, изјавил М.А. за медиумот.
Тој тврдел дека вакцината ја набавувал преку Србија. Новинарите на „Слободен печат“ пронашле една здравствена установа во Србија во која се нуди ваков препарат, но забележале дека изгледот на флаконите не се совпаѓа со ампулите што М.А. им ги аплицирал на пациентите во Македонија.
Според упатството за вакцината што се нуди во Србија, две шишенца се мешаат, а потоа дозата се аплицира на четири места – во двете рамења и на левата и десната страна од задникот. Спротивно на тоа, сите пациенти чии семејства разговарале со медиумот добиле инјекција само во едното рамо.
Во Македонија нема регистрирана „кубанска вакцина“ против рак
Во Македонија не е регистрирана „кубанска вакцина“ за лекување рак, ниту таа е во официјална употреба на онколошките оддели во земјата. Директорот на Универзитетската клиника за радиотерапија и онкологија, професор д-р Игор Стојковски, за „Слободен печат“ потврдил дека таква вакцина не е регистрирана во земјава.
Случајот повторно го отвора прашањето за опасностите од неодобрени и непроверени препарати што се нудат на пациенти со тешки заболувања. Во ситуација кога семејствата очајно бараат начин да им помогнат на своите блиски, ветувањата за лекување можат да ја отежнат проверката на потеклото и составот на препаратите што им се нудат.
Според информациите објавени од „Слободен печат“, велешанецот е предмет на предистражна постапка, а полицијата веќе извршила претрес и му го одзела мобилниот телефон. Наводите на семејствата, резултатите од анализите и сите други околности треба да бидат проверени од надлежните институции во рамките на постапката.
Целиот текст прочитајте го на официјална веб страна на Слободен Печат
Извор: СлободенПечат.мк
