Управата за извршување на санкциите соопшти дека се спроведува втората судска одлука за замена на казната затвор со куќен затвор со електронски надзор.
Станува збор за возрасно лице со сериозни здравствени проблеми, кое не можело адекватно да се третира во казнено-поправната установа. Остатокот од неиздржаниот дел од казната, во траење од 11 месеци и 28 дена, сега ќе се извршува во домашни услови. Решението е донесено од Основниот суд во Струга.
За следење на казната е поставена алка на глуждот на ногата, а пробациските службеници ќе го известат судот доколку лицето не ги почитува упатствата за користење на опремата или ограничувањата од судската одлука, согласно Законот за пробација.
Одделението за електронски надзор ќе го следи извршувањето 24/7, а пробациската канцеларија од Охрид е во постојана координација со надлежните институции.
Овој начин на извршување е поекономичен за државата, а истовремено похуман за лицето поради неговата возраст и здравствената состојба, велат од Управата за извршување на санкциите.
Минатата година, Основниот суд Велес донесе прва пресуда за куќен затвор во траење од 3 месеци, на старо и изнемоштено лице, што го отвори патот за поширока примена на електронски надзор при извршување на казни.
