Последната акција на безбедносните служби во Скопје повторно го отвори прашањето за активностите на мрежите инспирирани од идеологијата на Исламска држава (ИСИС) во Северна Македонија.
Според истражните органи, осомничените во актуелниот случај не се поврзуваат само со класичен криминал, туку со структура во која, според досегашните сознанија, биле присутни радикализација, ширење екстремистичка пропаганда и недозволено поседување оружје.
При претресите биле пронајдени автоматски пушки, пиштоли, муниција, тактичка опрема, комуникациски уреди, електронска опрема, мобилни телефони, знаме на ИСИС, како и пари во денари и странска валута. Во рамки на акцијата било откриено и неовластено користење електрична енергија за копање криптовалути.
Судската постапка довела до новата истрага
МВР во последните денови привело лица од Скопје кои се сомничат за поврзаност со радикална исламистичка структура. За случајот е отворена истрага за кривични дела поврзани со тероризам, како и за неовластено изработување, држење, посредување и тргување со оружје или експлозивни материи.
До осомничените и предметите што биле пронајдени кај нив, според надлежните, се дошло преку документи и информации презентирани во тековна судска постапка пред Кривичниот суд, како и преку докази обезбедени со меѓународна правна помош.
Групата била идентификувана на 28 септември. Според истражните органи, постоеле сознанија дека лицата биле инволвирани во активности поврзани со тероризам и недозволена трговија со оружје.
Биле извршени претреси кај шест лица, на вкупно 12 локации во Скопје. Во акцијата биле приведени пет лица.
При претресите биле одземени различни видови оружје и муниција, како и друга опрема и електронски уреди. Меѓу пронајдените предмети било и официјално знаме на ИСИС.
Сомневања за радикализација на млади лица
Според полициските сознанија, првоосомничениот, 34-годишник, од 2023 година бил активен во рамките на криминална организација. Истражителите се сомневаат дека бил вклучен во индоктринација на млади лица, ширење материјали со екстремна и радикална содржина, како и активности поврзани со огнено оружје.
За повеќе други лица постојат сомневања дека биле инволвирани во неовластено изработување, држење, посредување и тргување со оружје или експлозивни материи.
Од Агенцијата за национална безбедност било соопштено дека претреси биле спроведени и на повеќе локации во Сингелиќ, Чаир и Брест.
Според безбедносните институции, станува збор за верско-радикална групација за која постојат сомневања дека била поврзана со транснационални криминални структури и различни форми на криминални активности.
Дел од приведените лица, според сознанијата на службите, одржувале контакти со странски терористички борци од Северна Македонија и регионот.
Индоктринацијата на млади лица, според институциите, била континуирана активност, при што интернетот бил користен како еден од каналите за ширење на радикални содржини и влијание врз потенцијални поддржувачи.
Втор поголем случај поврзан со радикален екстремизам во 2026 година
Актуелната истрага е втор поголем случај во 2026 година што надлежните го поврзуваат со радикален екстремизам.
Во јуни, МВР поднесе кривична пријава против пет лица од Скопје, кои беа осомничени дека преку интернет-канал ширеле џихадистичка пропаганда и повикувале на формирање терористичка организација по примерот на ИСИС.
Според тогашните наводи од истрагата, групата користела интернет-апликации за промовирање на идеологијата на ИСИС, ширење пропаганда, идеолошко влијание и величење на припадници на терористички организации.
Проблемот со лица од Северна Македонија кои се поврзувале со ИСИС е регистриран и во претходните години. Во 2022 година Владата објави листа со 15 македонски државјани за кои било наведено дека учествувале во паравоени формации во Сирија и во редовите на ИСИС.
За тие лица биле воведени финансиски санкции, меѓу кои и мерки за замрзнување на имотот и средствата, како дел од државните активности насочени кон спречување на финансирањето и поддршката на тероризмот.
Последната акција, според досегашните информации од надлежните институции, покажува дека истрагите продолжуваат да ги следат можните врски меѓу радикализацијата, екстремистичката пропаганда, криминалните активности и недозволеното оружје.
