Министерството за внатрешни работи ја забрзува процедурaта за огласување и замена на изгубените или украдените лични документи преку дигитализација на соработката со Службен весник.
Секторот за информатичка технологија при МВР разви веб-решение за размена на податоци за објавување на документи кои треба да се прогласат за неважечки и да се издадат нови. Со ова, досегашната размена преку електронска пошта се укинува, а податоците ќе се пренесуваат преку националната платформа за интероперабилност, согласно договорот помеѓу МВР и Службен весник.
Новата постапка овозможува Службен весник на дневна основа автоматски да ги презема пријавените изгубени или украдени документи за нивно објавување како неважечки. По објавувањето, МВР преку истата платформа автоматски ги презема ажурираните податоци и ги внесува во интерниот систем, овозможувајќи на граѓаните побрзо да извадат нови документи.
