Општина Кавадарци влегува во финалната фаза од реализацијата на еден од најзначајните инфраструктурни проекти за оваа година. Во месноста Моклиште во тек е комплетно испитување и тестирање на новоизградената водоводна и канализациона мрежа, што претставува последен и клучен чекор пред нејзиното официјално пуштање во употреба.
Станува збор за капитален проект во должина од дури 6,4 километри, чија вкупна вредност изнесува 1 милион евра. Оваа крупна инвестиција во модерна комунална инфраструктура е реализирана со заеднички средства, финансирана од Министерството за животна средина и просторно планирање и Локалната Самоуправа на Општина Кавадарци.
Модерна инфраструктура за поквалитетен живот
Со успешното тестирање на мрежата се потврдува функционалноста и сигурноста на целиот систем, со што трајно се решава прашањето со водоснабдувањето и одведувањето на отпадните води во овој дел од општината.
Локалната самоуправа предводена од градоначалникот Митко Јанчев уште еднаш докажува дека рамномерниот развој и инвестициите во капитални објекти остануваат врвен приоритет. Општина Кавадарци продолжува со силно темпо да инвестира во модерни комунални решенија кои директно го подобруваат квалитетот на живот на граѓаните и ја заштитуваат животната средина.
