Граѓаните од Македонија кои планираат да заминат на работа во Германија би можеле да се соочат со потешки услови доколку се реализира најавеното намалување на квотата за работници од Западен Балкан. Германската влада планира од 1 јануари 2027 година да го преполови бројот на одобренија за работа што се издаваат според посебниот режим за земјите од регионот.
Според најавениот план, годишната квота би се намалила од досегашните 50.000 на 25.000 одобренија. Тоа значи дека бројот на работници од Западен Балкан кои би можеле да заминат во Германија преку оваа можност би бил значително помал во споредба со сегашниот лимит.
Станува збор за таканареченото „Правило за Западен Балкан“, кое им овозможува на граѓаните од Македонија, Србија, Албанија, Босна и Херцеговина, Црна Гора и Косово да се вработат во Германија врз основа на важечки договор за работа. Оваа можност важи и за работни места за кои не се бара формална стручна квалификација.
Мерката е дел од реформски пакет со вкупно 34 точки, договорен од владејачката коалиција во Германија, составена од Христијанско-демократската унија и Христијанско-социјалната унија (CDU/CSU) и Социјалдемократската партија на Германија (SPD).
Како главна причина за планираното намалување на квотата, германската влада ја наведува зголемената стапка на невработеност во земјата. Со оваа промена се предвидува да се ограничи бројот на одобренија што годишно ќе им бидат достапни на работниците од шесте земји од Западен Балкан.
Доколку планот стапи во сила, од 1 јануари 2027 година конкуренцијата за местата во рамките на оваа квота би можела да стане поголема, бидејќи бројот на достапни одобренија ќе биде преполовен.
